KRL hala’o sesaun debate kona-ba peskiza preliminár no tada rekomendasaun kona-ba lejizlasaun komersiál iha Timor-Leste.

Kin, 05/04/2017 - 18:46

Iha loron-4, fulan maiu, iha sala Orchid Timor Plaza – Díli nian, Komisaun ba Reforma Lejizlativa no ba Setór Justisa (KRL) realiza tiha sesaun debate ida kona-ba peskiza preliminár no rekomendasaun sira kona-ba lejizlasaun komersiál iha Timor-Leste.

Sesaun ida ne’e nia objetivu maka halo análize hamutuk ba konkluzaun no rekomendasaun preliminár sira hodi finaliza relatóriu espesializadu kona–ba kuadru lejizlativu komersiál Timor-Leste nian.

Relatóriu ko’alia kona-ba oinsá halo adekuasaun ba lei iha área komersiál nian hodi, nune’e, bele klaru liu, simples, kompletu no konsistente no sai prátiku liu ba emprezáriu sira iha Timor –Leste, inklui matéria kona-ba Administradór empreza komersiál nia kontratu no Devér iha Timor-Leste.

Rezultadu preliminár ne’ebé aprezenta daudauk ne’e sei dezenvolve iha relatóriu espesializadu no sei lori filafali ba diskusaun iha “Síklu Debate Kona-ba Konkluzaun no Rekomendasaun sira ba Reforma” ne’ebé sei hala’o entre loron-22 to’o 30 iha fulan juñu tuir mai.

KRL maka organiza eventu ne’e no sura ho partisipasaun hosi reprezentante ida hosi Banku sentrál Timor-Leste, advogadu privadu nasionál no internasionál sira ne’ebé hala’o knaar iha Timor-Leste, nomós reprezentante hosi MECAE no Ministériu Justisa.

Iha ámbitu ba peskiza ida ne’e sura ho asisténsia téknika ne’ebé finansia hosi Governu Australianu, liu hosi nia Embaixada/DFAT, Programa Servisu ba Apoiu governasaun ba Dezenvolvimentu, iha Timor-Leste.